打咗四針，去得安心！

南美之旅終進入倒數階段，近日忙碌非常：在離職前處理好交接工作、強行把辦公室桌底和抽屜清倉、趕及做好所有兼職、完成之前答應朋友的一些事情、計劃好離港四個多月的各項私人事務、為旅程準備行裝等等。

本來還未決定是否應打黃熱病針才出發（黃熱病一般流行於南美和非洲等地，這些地區的國家有權要求旅客入境前注射黃熱病，否則可拒絕旅客入境），因 lonely planet forum 內很多旅人也指，除非是坐飛機入境巴西，否則南美各國入境人員絕少要求旅客出示黃熱病針紙。何況往衛生署旅遊健康中心打一針也不便宜，醫生顧問費 $315 ，再另加 $200 針藥費，實在令我們卻步。

但驚青的我，想了很久，還是怕入境人員一不小心真的要求我出示針紙而呆在當場，加上友人提醒還是給家人和自己一個安心，好，忍痛去一趟吧！本計劃只打一針黃熱病針，但最後走出中心，手臂卻被叮了四針，四針喎！甲型肝炎、傷寒、破傷風加黃熱，再加高山症和瘧疾藥，盛惠 $1070，我知我知，較私家診所，這收費絕不昂貴（中心的專科醫生多次強調這是良心價），但我不得不承認我還是有「乞兒兜裏面被搶飯食」的感覺！

可能前往中心詢問的旅客一般都心情絕佳，中心的氣氛輕鬆自在，專科醫生和護士均十分友善，甚至很攪笑。


當醫生一輪機關槍地解說我要打四支防疫針後：

我 (垂死掙扎)：「醫生醫生，打四針喎！一次過打四針喎！係咪會死架？」
醫生笑：「唔會架，不過呢兩日攰啲囉！」
我 (扮勤力員工)：「但我要翻工喎！」
醫生繼續笑：「咁都係因人而異，有啲人只係少少攰，有啲人就可能會咁......」說是遲，那是快，竟應聲將身前傾，把一邊耳仔貼到桌前，作攰爆狀！
我 (被擊倒)：「......」


當醫生瞄瞄表格內我列寫的行程，談高山症危機時：

醫生（定個抬炸彈樣子）：「你實去邊度邊度同邊度邊度啦？」
我：「係呀係呀！」
醫生：「咁呀，邊度邊度係海拔幾多幾多米，都好高吓啦，不過你都係由邊度邊度去果度架啦可？如果咁，去到邊度邊度都好啲既，有時間適應，但係你由邊度去到邊度呢，海拔又去到幾多幾多米，又都有高山症既危機......」總之就是無抖氣位地飛出一輪地名和海拔高度......

我一邊扮清醒和熟知整個行程，一邊只想趁機問他：「醫生，不如你做我哋導遊吧？啲地點你咁熟，成個行程你又清楚過我喎！我都未計劃得咁仔細播！」

－－－－－－

醫生：「如果你上到去 2500米以上，覺得頭痛、氣喘，同雙腳沉重，咁好有可能係高山症既病徵啦！」
我：「醫生，但我喺香港要翻工既日子都係咁喎！」
醫生：「嘻嘻，咁我幫唔到你喎！」

當護士替我打針時：

我 (仲死心不息)：「護士護士，打四針喎！一次過打四針喎！係咪會死架？」
護士笑：「唔會架，有人一次過打七針都唔死得喎！」
我 (被銀芽銀芽)：「......」
(四支打畢)
護士繼續笑：「係咪好痛呢......個心？打成千蚊針！」
(輸晒......）

　
護士姐姐的打針和貼膠布技術爐火純青，看，左右兩邊是對稱的！